२०८३ श्रावण २३, शनिबार
काभ्रे । २ दशकदेखि सञ्चार क्षेत्रमा कार्यरत पत्रकार ज्ञानमणि नेपाल कालोटोपीको सम्पादनमा प्रकाशित पहिलो पुस्तक ‘डा. सत्यमोहन जोशी, डा. इन्दुल केसी र दुई थुँगा फूल’ शनिबार एक कार्यक्रमका बिच सार्वजनिक भएको छ ।
शब्दयात्रा प्रकाशनको आयोजनामा भएको कार्यक्रममा पुस्तकका लेखक स्वयं तथा वरिष्ठ साहित्यकार अरुणबहादुर खत्री ‘नदी’ ले संयुक्त रूपमा पुस्तक सार्वजनिक गरेका थिए । शब्दयात्रा प्रकाशनका अध्यक्ष हरि मञ्जुश्रीका अनुसार यो प्रकाशन संस्थाबाट सार्वजनिक भएको २८३ औँ पुस्तक हो । २०६८ सालमा स्थापना भएको शब्दयात्रा प्रकाशनले साहित्य, पत्रकारिता तथा विभिन्न सिर्जनात्मक क्षेत्रमा योगदान पु¥याउने व्यक्तित्वलाई सम्मान गर्दै पुस्तक प्रकाशनलाई निरन्तरता दिँदै आएको छ ।
सम्पादकको परिचय
पुस्तकका सम्पादक ज्ञानमणि नेपाल कालोटोपी काभ्रेपलाञ्चोकको मण्डनदेउपुर नगरपालिका–१० निवासी हुन् । उनले विगत २३ वर्षदेखि पत्रकारिता क्षेत्रमा निरन्तर सक्रिय रहँदै आएका छन् । यस अवधिमा करिब १० वटा सञ्चारमाध्यममा काम गरिसकेका कालोटोपी हाल नेपाल पत्रकार महासंघ काभ्रे शाखाका कार्यसमिति सदस्य, मध्यमार्ग साप्ताहिकका सहसम्पादक तथा कालोटोपी डटकमका सञ्चालक एवं सम्पादक हुन् । उनका अन्य केही पुस्तकहरू निकट भविष्यमा प्रकाशन हुने तयारीमा रहेका छन् ।
आठ स्रष्टा सम्मानित
सोही अवसरमा शब्दयात्रा प्रकाशनले विभिन्न क्षेत्रका आठ जना व्यक्तित्वलाई शब्दयात्रा प्रकाशन पुरस्कारबाट सम्मान गरेको छ । सम्मानित हुने व्यक्तित्वहरूमा–केदार शाक्य (सङ्खुवासभा), राममणि दुङ्गेल (भक्तपुर), नीरा अधिकारी (ललितपुर), विवश पोखरेल (मोरङ), सन्ध्या पहाडी (कपिलवस्तु), अरुणबहादुर खत्री ‘नदी’ (तनहुँ), पासाङ दोर्ची शेर्पा (भोजपुर), पूर्णबहादुर कर्माचार्य (काभ्रेपलाञ्चोक) लाई सम्मान समर्पण गरिएको थियो ।
कार्यक्रमको सञ्चालन शब्दयात्रा प्रकाशनका आजीवन सदस्य कालिका त्रिपाठी पन्तले गरेकी थिइन् भने संस्थाका अध्यक्ष हरि मञ्जुश्रीले संस्थाको गतिविधि तथा पुरस्कार कार्यक्रमबारे जानकारी गराएका थिए ।
